Ný stikla er komin fyrir næstu Scary Movie mynd, þá fimmtu í röðinni. Scary Movie myndirnar eru grínmyndir sem gera grín að öðrum Hollywood myndum.
Það eru liðin 6 ár síðan síðasta Scary Movie mynd kom út, og síðan þá hafa ansi margar myndir komið út sem tilvalið er að gera dálítið grín að.
Sjáðu stikluna hér að neðan:
Aðalsagan í myndinni er tilvísun í Black Swan, en einnig er mikið vísað í Inception og Paranormal Activity, eins og sést í stiklunni.
Í myndinni leika meðal annarra: Ashley Tisdale, Lindsay Lohan, Charlie Sheen, Molly Shannon, Terry Crews, Heather Locklear, Kate Walsh, Mike Tyson og Katt Williams.
Söguþráðurinn er á þessa leið: Hinn snobbaði, fáláti, hrokafulli og ofurkynþokkaði franski danshöfundur Pierre er að setja upp nýja sýningu. Jody, sem er um þrítugt og tveggja barna móðir, og vinkona hennar hin afrísk-ameríska Kendra, eru báðar að reyna að næla sér í aðalhlutverk í sýningunni. Hin ofurstjórnsama móðir Jody er sannfærð um að Jody muni á endanum hljóta glæstan frama í dansi, þó hann hafi hingað til smogið úr greipum hennar.
Hin hæfileikaríka díva og dansari hjá fyrirtækinu, Heather Daltry, er sagt upp störfum og fær ekki að vera með í verkefninu, og gengur berserksgang.
Scary Movie 5 kemur í bíó þann 12. apríl nk.