Bandaríska sjónvarpsstöðin HBO staðfesti nú rétt í þessu að fyrsti þátturinn í sjöttu þáttaröð Game of Thrones þáttanna vinsælu verði frumsýndur í Bandaríkjunum 24. apríl nk. Um er að ræða fyrsta þáttinn af tíu.
Þættirnir eru byggðir á bókaröð George R.R. Martin A Song of Ice and Fire, og hafa unnið til fjölda Emmy sjónvarpsverðlauna í Bandaríkjunum.
Á meðal leikara í síðustu þáttaröð voru Emmy og Golden Globe verðlaunahafarnir Peter Dinklage, Nikolaj Coster-Waldau, Lena Headey, Emilia Clarke, Aidan Gillen, Kit Harington, Diana Rigg, Natalie Dormer, Maisie Williams og Sophie Turner.
Lítið er enn vitað um nýju þáttaröðina, en um Game of Thrones er það helst að frétta að útgáfu nýjustu bókar George R.R. Martin, The Winds of Winter, hefur verið seinkað og kemur ekki út fyrr en sýningum á sjöttu þáttaröðinni lýkur í sjónvarpi.