Steinaldarhrekkjalómarnir í teiknimyndinni, The Croods – Grug, Eep, Ugga, Thunk, Gran, Ooga-Booga, Dinobot, Bert, Homo Ridunculo, Bunk, Plock, Pook, Snook, Wook, Bongo og Badger, sem sjást að hluta til á meðfylgjandi mynd, eru á leiðinni upp á hvíta tjaldið á ný í framhaldsmyndinni The Croods 2.
Handritshöfundarnir og leikstjórarnir Chris Sanders og Kirk DeMicco staðfestu í þetta í samtali við ComingSoon vefsíðuna.
Þeir sögðu einnig að leikararnir Nicolas Cage, Ryan Reynolds og Emma Stone myndu öll snúa aftur og tala fyrir persónur myndarinnar.
„Það er ekki hægt að segja mikið meira ennþá,“ sagði Sanders í viðtalinu. „Við erum með stóran leirklump í höndunum sem við erum að byrja að móta akkúrat í þessum töluðu orðum.“
Fyrri myndin sló í gegn, og hefur þénað meira en 585 milljónir Bandaríkjadala frá því hún var frumsýnd í mars sl.