Lake Placid og Anaconda kvikmyndaseríurnar munu brátt renna saman í eitt í myndinni Lake Placid Vs. Anaconda. Tökur hefjast í desember í Búlgaríu.
Óvíst er hver skrifar handrit, leikstýrir eða leikur aðalhlutverk í þessari mynd sem mun fara beint á vídeó.
Ekki er heldur vitað um hvað sagan er, en þó má geta sér til um að hinir illskeyttu krókódílar úr Lake Placid muni eiga í einhverjum viðskiptum við risastórar Anaconda slöngur, og þessi dýr muni berjast í vatninu þar til yfir lýkur.
Anaconda serían hófst árið 1997 með mynd með þeim Jennifer Lopez, Ice Cube og Jon Voight í aðalhlutverkum. Í kjölfarið fylgdu svo þrjár framhaldsmyndir sem allar fóru beint á vídeó; Anacondas: The Hunt for the Blood Orchid (2004), Anaconda 3: The Offspring (2006) og Anaconda 4: Trail of Blood (2009).
Lake Placid frá árinu 1999 var einnig sýnd í bíó, með Bill Pullman, Bridget Fonda og Oliver Platt, í aðalhlutverkum. Í kjölfarið fylgdu svo þrjár framhaldsmyndir sem allar fóru beint á vídeó: Lake Placid 2 (2007), Lake Placid 3 (2010) Lake Placid: The Final Chapter sem kom út í fyrra.