Live Free or Die Hard leikarinn Justin Long hefur verið ráðinn til að leika í prufuþætti nýrrar gamanþáttaraðar sem Warner Bros TV er að þróa, sem fjallar um fótbolta.
Long mun leika fótboltaþjálfarann Marty Schumacher, sem er nýskilinn. Marty er haldinn ólæknandi bjartsýni, hann rekur íþróttavörubúð og er einnig „fjandi góður“ þjálfari hjá flottu liði, sem hann elskar meira en allt annað í lífinu. Marty, sem komst með lið sitt í úrslitakeppnina á landsvísu fyrir tveimur árum, er nú að ráða inn ungar stúlkur í draumalið sitt til að endurtaka leikinn frá því fyrir tveimur árum.
Ekki kemur fram í frétt The Wrap hvenær sýningar hefjist á þáttunum, fari svo að prufuþátturinn gangi vel.