Litla stóra pandan (2012)

Í fjöllum Kína býr litli og forvitni pandabjörninn Manchu með fjölskyldu sinni og vinum. Allt væri í góðu ef ekki kæmi til að mannfólkið er sífellt að þrengja sér lengra inn í vistkerfi pandabjarnanna og heggur óspart niður bambustrén sem er uppáhaldsfæða bjarnanna. Nú er svo komið að maturinn er á þrotum og því nauðsynlegt fyrir pandabirnina að finna sér nýjan dvalarstað. Manchu ákveður því að leggja land undir fót til að finna nýtt heimili þar sem nóg er til af gómsætum bambustrjám. Þegar hann finnur góðan stað í dal nokkrum kemur hins vegar í ljós að mannfólkið hefur byggt þar risastóra stíflu sem mun fljótlega sökkva dalnum í vatn. Manchu verður að koma í veg fyrir að þetta gerist, en hvað getur lítill pandabjörn eins og hann gert í málunum?