Horrible Bosses 2, framhald gamanmyndarinnar vinsælu Horrible Bosses, verður frumsýnd í kringum þakkargjörðarhátíðina í Bandaríkjunum á næsta ári, 2014.
Í myndinni leiða þeir saman hesta sína á ný þeir Jason Bateman, Charlie Day og Jason Sudeikis í hlutverkum sínum sem misnotaðir starfsmenn í fyrirtækjum. Myndin verður nánar tiltekið frumsýnd þann 26. nóvember 2014.
Fyrri myndin var frumsýnd á allt öðrum tíma ársins, eða 8. júlí 2011. Sú mynd þénaði 117 milljónir Bandaríkjadala í Bandaríkjunum og 209 milljónir dala á heimsvísu.
Aðrar myndir sem verða frumsýndar um svipað leiti á næsta ári eru Home, teiknimynd frá DreamWorks Animation, og The Hunger Games: Mockingjay – part 1, en hún verður frumsýnd nokkrum dögum fyrr, eða 14. nóvember.