Matthew McConaughey hefur bæst í leikarahóp fyrir næstu mynd Óskarsverðlaunaleikstjórans Stevens Soderbergh, Magic Mike, en innblásturinn í myndina er sóttur í feril leikarans Channing Tatum sem strippari, áður en hann varð leikari.
Variety kvikmyndablaðið segir að McConaughey, sem er 41 árs, muni leika nektardansara sem er hættur störfum í klúbbnum þar sem Magic Mike, sem Tatum leikur, vinnur. Á meðal annarra sem leika strippara á staðnum verða Matt Bomer og Alex Pettyfer, sem er einskonar lærisveinn Magic Mike.
Soderbergh segir að myndin verði: „kynþokkafull, fyndin og sláandi.“
Kvikmyndir.is sagði frá kvikmyndinni fyrir nokkru síðan, en þar er einmitt vídeó frá strippferli Channing Tatum, en hann dansaði á nektardansstað til ársins 1999.