Það er enn langt þangað til við fáum að sjá Hobbitann á hvíta tjaldinu, en New Line Cinema, Warner Bros. og MGM tilkynntu nýlega hvenær báðir hlutar verða frumsýndir, og sömuleiðis titla þeirra beggja.
Fyrri hlutinn, hinn svonefndi The Hobbit: An Unexpected Journey, verður frumsýndur 14. desember árið 2012, á meðan seinni hlutinn, The Hobbit: There and Back Again, verður frumsýndur ári seinna, eða 13. desember, 2013.
Tökur hófust fyrir nokkru síðan og þrátt fyrir að myndin gerist á undan Hringadróttinssögu munu mörg kunnugleg andlit birtast aðdáendum, en til dæmis var nýlega staðfest að Orlando Bloom myndi vinda sér aftur í hlutverk álfsins Legolas. Hobbitinn verður að sjálfsögðu í leikstjórn Peter Jackson, en fremstir í gríðarlega stórum og flottum leikarahóp fara þeir Martin Freeman og Ian McKellen.
