Hinsegin bíódagar endurvaktir 29. júlí – 7. ágúst

Hinsegin bíódagar verða endurvaktir eftir fimm ára hlé dagana 29. júlí til 7. ágúst. Á hinsegin bíódögum verða sýndar hinsegin myndir, eins og nafnið gefur til kynna, og fara sýningar á þeim fram í Bíó paradís við Hverfisgötu.
Hinsegir bíódagar eru haldnir í samvinnu við Hinsegin daga sem að þessu sinni fara fram 4.-7. ágúst nk.

Eftirtaldar myndir verða sýndar:

Howl (Ýlfur)

Tegund og ár: Leikin mynd, 2010
Lengd: 84 mín.
Land: Bandaríkin
Texti: Íslenskur
Leikstjórar: Rob Epstein, Jeffrey Friedman
Aðalhlutverk: James Franco, Todd Rotondi og Jon Prescott

Um líf og störf hins kunna bandaríska rithöfundar Allan Ginsberg, eins helsta forvígismanns „Beat kynslóðarinnar“ svonefndu. Í ólínulagaðri frásögn er blandað saman bútum úr lífi Ginsberg á fimmta og sjötta áratug síðustu aldar, frumflutningi hans á hinu fræga ljóði sínu Howl (Ýlfur), sviðsetningu ljóðsins í hreyfimynd (animation) og réttarhöldum yfir útgefanda bókarinnar sem kærður var fyrir brot á velsæmi árið 1957. Myndin hefur hlotið fjölda verðlauna og tilnefninga.
Broderskap (Bræðralag)

Tegund og ár: Leikin mynd, 2009
Lengd: 90 mín.
Land: Danmörk
Texti: Enskur
Leikstjóri: Nicolo Donato
Aðalhlutverk: Nicolas Bro, David Dencik og Thure Lindhart

Tveir fyrrum hermenn kynnast þegar þeir hefja þjálfun hjá hreyfingu nýnasista. Í fyrstu lendir þeim harkalega saman en samband þeirra breytist við nánari kynni í gagnkvæma virðingu og vináttu og loks í ástarsamband. Þegar hið nána samband þeirra uppgötvast standa þeir frammi fyrir mikilli hættu.

Myndin hefur vakið mikla athygli og umtal síðan hún var frumsýnd fyrir tæpum tveimur árum. Sýnd í samvinnu við Danska sendiráðið á Íslandi.
Tomboy (Strákastelpa)

Tegund og ár: Leikin mynd, 2011
Lengd: 84 mín.
Land: Frakkland
Texti: Enskur
Leikstjóri: Céline Sciamma
Aðalhlutverk: Zoé Héran, Malonn Lévana og Jeanne Disson

Ung stúlka, Laure, flytur á nýjan stað eitt sumar. Hún kynnir sig fyrir nágrönnum sem strákur að nafni Mickaël. Blekkingin gengur afar vel upp og ein vinkona hennar, Lisa, verður ástfangin af „Mickaël“. Taka þá mál nokkuð að flækjast…
L´Arbre et la forêt (Skógurinn og trén)

Tegund og ár: Leikin mynd, 2010
Lengd: 95 mín.
Land: Frakkland
Texti: Enskur
Leikstjórar: Olivier Ducastel, Jacques Martineau
Aðalhlutverk: Guy Marchand, Françoise Fabian og Sabrina Seyvecou

Frederick er höfuð virðulegrar efnafjölskyldu og síðastliðin sextíu ár hefur hann átt sér leyndarmál. Konan hans og elsti sonur eru þau einu sem vita hið sanna. Samband hans við soninn er erfitt en þegar sonurinn fellur skyndilega frá, finnur Frederick sig knúinn til að koma útúr skápnum og opinbera samkynhneigð sína. Við það hriktir í stoðum fjölskyldunnar. Myndin hefur fengið frábæra dóma.