Sjónvarpsþættirnir vinsælu Entourage, sem luku göngu sinni árið 2011, eru á leiðinni á hvíta tjaldið.
Samkvæmt Deadline hefur Warner Bros ákveðið að gera kvikmynd upp úr þeim. Leikstjóri verður Doug Ellin, sem var einn af framleiðendum þáttanna.
Ekki hefur verið ákveðið hvenær myndin lítur dagsins ljós en viðræður við leikarahópinn eru í gangi.
Vangaveltur um kvikmyndina hafa verið í gangi undanfarið ár, eða eftir að Mark Wahlberg, sem var einnig einn af framleiðendunum, sagðist vonast til að hún yrði gerð.
Samkvæmt Deadline hefst myndin hálfu ári eftir að síðasta þættinum lauk. Hugsanlega gerist hún erlendis en ekki í Kaliforníu þar sem Vincent Chase og félagar áttu heima.