Sylvester Stallone er nú í óða önn að safna liði fyrir þriðju Expendables myndina, en myndir númer eitt og tvö voru báðar þrælgóð blanda af spennu, slagsmálum og húmor.
Stallone minntist á það snemma að hann vildi fá Nicholas Cage, Wesley Snipes og Harrison Ford til að leika í myndinni og nú hefur hann staðfest að Cage muni leika í myndinni.
Spænska dagblaðið El Pais átti samtal við leikarann á dögunum þar sem hann staðfestir þetta, en segir þar jafnframt að hann sé enn að reyna að ná í skottið á þeim Ford, Snipes og Mickey Rourke, sem lék í fyrstu myndinni.
„Við erum að undirbúa myndina af sömu ástríðu og staðfestu og hinar tvær myndirnar. Við erum með Nicholas Cage staðfestan, frábær leikari […..] Vonandi getum við náð í Harrison Ford, Wesley Snipes og Mickey Rourke.“