Þrír leikarar keppast um aðalhlutverkið í Star Wars

Nú þegar Girls-leikarinn Adam Driver hefur tryggt sér sæti sem skúrkurinn í nýjustu Star Wars-myndinni þá bíða eflaust margir eftir því að sjá hver muni leika hetjuna.

star-wars-casting

Samkvæmt heimildum Variety þá eru þrír leikarar sem J.J. Abrams hefur augastað á fyrir aðalhlutverkið. Downton Abbey-stjarnan Ed Speelers, Attack the Block-leikarinn John Boyega og síðast en ekki síst Jesse Plemons úr Breaking Bad. Þessir þrír leikarar eru sagðir vera á toppi listans yfir þá sem koma til greina en Disney hefur ekki staðfest neinar fréttir líkt og fyrri daginn.

Hlutverkið er einnig í móðu en heimildir staðfesta að aðalpersónan verði Jedi-lærlingur. Upprunalega handritið beindi þó ljósi sínu á börn Han Solo og Leiu prinsessu en handritið hefur síðan þá verið endurskrifað margoft.

Star Wars Episode VII fer í tökur í sumar.