Þriðja sería af Twin Peaks væntanleg

twinpeaksLeikstjórinn David Lynch staðfesti á Twitter-síðu sinni í gær að hann og framleiðandinn Mark Frost ætla að ráðast í gerð á þriðju seríu af sjónvarpsþáttunum Twin Peaks.

Ákveðið hefur verið að gera níu þætti sem verða sýndir á sjónvarpstöðinni Showtime árið 2016.

Leikarinn Kyle MacLahlan hefur verið orðaður við hlutverk sitt í þáttunum, en hann fór á kostum á sínum tíma sem hinn sérvitri alríkisfulltrúi Dale Cooper.

Þættirnir munu gerast í nútímanum og eru framhald af annarri seríu og gerast því 25 árum eftir atburðina í þeirri seríu.

Þættirnir voru gerðir í lok 9. áratugarins og sá hluti heimsbyggðarinnar sem átti sjónvarp sat sem límdur yfir þeim. Twin Peaks fjölluðu um rannsókn á morði á framhaldsskólastúlku. Inn í rannsóknina blönduðust dulræn fyrirbrigði og fleira dularfullt og skrýtið.