Eftir áratugi í þróun og ótal tilraunir til að koma verkefninu af stað er loksins komið að því. Masters of the Universe, eða einfaldlega He-Man, er að snúa aftur í kvikmyndahús og þetta lítur út fyrir að verða ein stærsta nostalgíu- og ævintýramynd ársins.
Fyrstu ljósmyndir og umfjallanir benda til þess að hér sé um að ræða stórt og metnaðarfullt fantasíuævintýri sem reynir að endurvekja heiminn sem heillaði heila kynslóð á níunda áratugnum.
He-Man snýr aftur í nýrri mynd
Masters of the Universe segir frá Adam, prinsi sem býr í Eterniu, goðsagnakenndum fantasíuheimi þar sem tækni, galdrar og fornar hetjusögur fléttast saman. Þegar ógn steðjar að ríkinu fær Adam kraft hins goðsagnakennda sverðs og umbreytist í He-Man, öflugasta stríðsmann heimsins. Þar þarf hann að standa uppi í hárinu á Skeletor, valdasjúkum galdramanni og erkióvini sem ætlar sér að ná yfirráðum yfir Eterniu og leggja heiminn undir sig.
Stór leikarahópur
Í aðalhlutverki er Nicholas Galitzine sem margir þekkja úr Red, White & Royal Blue. Fyrir hlutverkið stundaði hann líkamsrækt af kappi og sagði nýlega í viðtali að það hafi verið sérstök upplifun þegar tökum lauk og hann fékk loksins leyfi til að hætta æfingum og borða það sem hann vildi aftur.
Leikstjórinn Travis Knight hefur sagt að hlutverk He-Man hafi þó ekki bara snúist um vöðva heldur að finna leikara sem gæti sameinað styrk, húmor, sjarma og ákveðna viðkvæmni og mýkt sem gerir hetjuna að meiru en bara vöðvafjalli.
Á móti honum leikur svo Jared Leto hinn alræmda Skeletor.
Leikarahópurinn er annars einstaklega sterkur með Camila Mendes sem Teela, Idris Elba sem Duncan, Alison Brie sem Evil Lyn og Morena Baccarin í hlutverki galdrakonunnar.
Ísland á fulltrúa í Eterniu
Fyrir íslenska áhorfendur er svo sérstök ástæða til að mæta í bíó!
Jóhannes Haukur Jóhannesson leikur Malcolm eða Fisto sem er einn af eftirminnilegri stríðsmönnum Eterniu og Fjallið, eða Hafþór Júlíus Björnsson, birtist sem Goat Man í stóru skrímslahlutverki. Samkvæmt framleiðendum tók förðunin hjá Hafþóri allt að átta klukkustundir á dag sem segir sitt um umfang verkefnisins.
Og fyrir þá sem geyma gömlu myndina frá 1987 á sérstökum stað í hjarta sér þá má minnast á eitt skemmtilegt atriði enn; Dolph Lundgren sem lék upprunalega He-Man mun einnig koma fram í nýju myndinni í litlu en táknrænu hlutverki.
Hvort þetta verði upphafið að nýrri kvikmyndaröð á eftir að koma í ljós. En eitt er víst. He-Man er kominn aftur í bíó og í þetta skiptið með íslenskan ofurkraft með sér.
Masters of the Universe verður frumsýnd í öllum helstu bíóum landsins 4. júní.
Masters of the Universe (2026)
Heimildir
Variety: ‘Masters of the Universe’ Star Nicholas Galitzine on Eating Whatever He Wanted to Lose His He Man Body and Having a ‘Great Time’ Making ‘Red, White & Royal Wedding’
ScreenRant: Former He Man Star Dolph Lundgren Confirms Appearance In New Masters Of The Universe Movie
ScreenRant: Masters Of The Universe Cast: Every Actor In The He Man Movie
Slashfilm: One Masters Of The Universe Character Transformation Took 8 Hours Of Makeup [Set Visit]
IMDb: Masters of the Universe (2026)
