Eins og við sögðum frá hér á síðunni fyrr í vikunni, þá er komin út fyrsta stiklan fyrir framhaldið af Paul Blart: Mall Cop sem margir hafa beðið eftir, eða sumir amk.
Fyrri myndin sló í gegn og því var ekkert því til fyrirstöðu að búa til nýja mynd.
Kevin James er að sjálfsögðu mættur aftur til leiks í aðalhlutverkinu á Segway tvíhjólinu sínu sem öryggisvörðurinn í Kringlunni, sem fer nú á ráðstefnu öryggisvarða í Las Vegas, en þar gera öryggisverðir á spilavítunum stólpagrín að þeim, enda er öryggið í spilavítunum það mesta og besta í heimi. Paul Blart og kollegar hans láta verkin tala þegar glæpamenn ráðast á hótelið sem þeir gista á. Það gengur þó ekki allt að óskum, frekar en fyrri daginn, og meðal annars kýlir Paul Blart gamla konu í magann, þegar hann heldur að þar sé einn glæpamannanna á ferðinni.
Kíktu á stikluna hér fyrir neðan:
Paul Blart: Mall Cop 2 verður frumsýnd 17. apríl 2015.