Hliðarsería af sjónvarpsþáttunum vinsælu How I Met Your Mother eru nú í undirbúningi hjá CBS sjónvarpsstöðinni, en búið er að samþykkja að framleiða svokallaðan prufuþátt, en ef hann fellur í kramið verður möguleg gerð heil sería.
Þátturinn gengur undir vinnuheitinu How I Met Your Dad, og verður meira kvenfókuseraður, samkvæmt frétt Deadline vefjarins. Sagan í þáttunum yrði allt önnur en í How I Met Your Mother, með nýjum persónum og nýrri aðalpersónu.
How I Met Your Mother hófu nú í haust sitt níunda tímabil í sýningum, og njóta enn mikilla vinsælda í Bandaríkjunum og víðar.
