Þegar hver stórmyndin á fætur annarri er frumsýnd er hætt við því að slagurinn á toppi íslenska bíóaðsóknarlistans verði harður. Í síðustu viku var Elvis eins og kóngur í ríki sínu á toppi listans en nú hafa Skósveinarnir í myndinni Skósveinarnir: Gru rís upp hrint Elvis niður í annað sætið.
Í því þriðja er svo Bósi ljósár í kvikmyndinni Ljósár.
Aðsókn á Skósveinana var þrælgóð um helgina. Hátt í níu þúsund manns lögðu leið sína í bíó og aðgangseyrir var tæpar tólf milljónir króna.
Doctorinn tekjuhæstur allra
Tekjuhæsta kvikmynd í bíó á Íslandi í dag er Doctor Strange in the Multiverse of Madness með samtals rúmar 52 milljónir króna í tekjur en skammt á hæla hennar kemur Top Gun: Maverick með rúmar 48 milljónir króna í greiddan aðgangseyri.
Sjáðu topplistann í heild sinni hér fyrir neðan:
