Bíó Paradís verður heimili Alþjóðlegrar kvikmyndahátíðar í Reykjavík (RIFF) dagana sem hátíðin
stendur yfir. Þetta felur í sér að hið einstaka kvikmyndahús við Hverfisgötuna, sem á dögunum
fagnaði árs afmæli sínu, verður miðpunktur hátíðarinnar og helsti sýningarstaður.
Helstu myndir RIFF verða sýndar í Bíó Paradís og þar fer einnig fram lunginn af spurt og svarað
sýningum auk ýmissa annarra viðburða hátíðarinnar. Jafnframt verður veitingaaðstaða bíósins opin
frá kl. 11:30 alla daga meðan RIFF stendur yfir. Verður t.d. hægt að kaupa þar létta rétti auk kaffis og vínveitinga. Handhafar RIFF korta fá sérstakan afslátt og einnig verður sérstök „Gleðistund“ (Happy
Hour) frá 17-19 alla daga hátíðarinnar. Ekki er nauðsynlegt að kaupa miða til að nýta sér þjónustu
kaffihússins.
Þá munu RIFF og Bíó Paradís í sameiningu bjóða atvinnulausum frítt á allar sýningar hátíðarinnar sem
hefjast kl. 14.