Ákveðið hefur verið að selja aðeins í annað hvert sæti í Smárabíói og Háskólabíói, sjálfvirkni verður aukin og snertiflötum gesta fækkað.
Eins og kom fram í tilkynningu frá kvikmyndahúsum Senu, sem rekur Smárabíó og Háskólabíó, í síðustu viku, hefur verið ákveðið, með hliðsjón af aðstæðum í þjóðfélaginu, að bjóða upp á aukið pláss og þjónustu í bíóhúsunum næstu vikur og jafnvel mánuði. Þegar hefur verið gripið til ýmissa aðgerða vegna stöðunnar og tillit tekið til ráðlegginga yfirvalda og sóttvarnarlæknis. Nú hefur verið ákveðið að taka næsta skref.
Nú verður selt í annað hvert sæti í öllum almennum bíósölum til að hver gestur fái aukið rúmi og meira pláss, en þeir sem koma saman, t.a.m. pör, vinir og fjölskyldur, geta svo fært sig saman, en á sama tíma haft nóg pláss á milli sín og næsta hóps.
Einnig er boðið upp á stafrænar og sjálfvirkar lausnir til að fækka snertiflötum. Handspritti hefur verið komið fyrir víða fyrir viðskiptavini, hreinsun snertiflata hefur verið aukin til muna og hvatt er til aukins hreinlætis meðal allra sem erindi eiga í kvikmyndahúsin. Þá eru öll leiktæki í leikjasal Smárabíós hreinsun margsinnis daglega.
Fyrir þá sem vilja auka sjálfvirkni sína fyrir komandi heimsóknir í Smárabíó og Háskólabíó, er bent á að hægt er að kaupa bíómiða og veitingar Bíóklúbbs appinu og á heimasíðu bíóanna www.smarabio.is. Viðskiptavinir sem kaupa veitingar á þann máta geta sótt sínar veitingar beint í flýtikassa.
Þessar aðgerðir verða að fullu komnar til framkvæmda frá og með næsta mánudegi.