Farrelly bræðurnir hafa lengi reynt að koma Bakkabræðrum, eða The Three Stooges, á hvíta tjaldið en það virtist ætla að takast hjá þeim þegar Sean Penn, Jim Carrey og Benicio Del Toro tóku að sér hlutverk aulabárðanna þriggja. En stuttu seinna yfirgaf Penn framleiðsluna og nú virðist sem sprellarinn Jim Carrey sé á leiðinni út. Aðspurður sagði Carrey að hann væri einfaldlega orðinn of gamall. „Ég bætti töluvert á mig til að búa mig undir hlutverkið og vildi ganga enn lengra. Það er ekkert mál þegar maður er Robert De Niro, tvítugur og í góðu formi. En þegar maður er orðinn jafn gamall og ég er orðinn getur líkami manns ekki ráðið eins vel við þyngdarbreytingar og áður.“
Carrey, sem er 48 ára gamall, bætti við að lokum, „Svo væru Sean og Benicio að slá mig í höfuðið allan liðlangan daginn og ekkert gott kæmi af því. Einhver myndi missa auga.“
