Faðirvorið í flutningi Ingvars E. Sigurðssonar er, ásamt smá skammti af ofbeldi og kynlífi, áberandi í fyrstu kitlu úr íslensku spennumyndinni Borgríki II – Blóð hraustra manna sem var að koma út.
Myndin er sjálfstætt framhald myndarinnar Borgríki sem kom út árið 2011 og er eftir leikstjórann Olaf de Fleur, en hann skrifar handrit myndarinnar ásamt Hrafnkeli Stefánssyni.
Myndin segir frá Hannesi, metnaðarfullum yfirmanni innra eftirlits lögreglunnar. Til að ráða niðurlögum stórra glæpasamtaka ákveður hann að rannsaka Margeir, spilltan yfirmann í fíkniefnadeild lögreglunnar, eftir að hafa fengið ábendingu frá Gunnari, fyrrum glæpaforingja, sem situr í fangelsi. Hannes afræður að koma ungri lögreglukonu, Andreu, í stöðu njósnara á ferðum Margeirs. Aðgerðirnar leiða Hannes á hálan ís þar sem erfitt reynist að halda skýru höfði eftir því sem hann kemst nær takmarki sínu, að ná bæði Margeiri og erlenda glæpaforingjanum.
Með helstu hlutverk í myndinni fara þau Darri Ingólfsson, Ágústa Eva Erlendsdóttir, Ingvar E. Sigurðsson, Zlatko Krickic, Sigurður Sigurjónsson og Hilmir Snær Guðnason.
Borgríki II – Blóð hraustra manna verður frumsýnd næsta haust.
Sjáðu kitluna hér fyrir neðan:
Borgríki II – Teaser #1 from Olaf de Fleur on Vimeo.
