Breska kvikmyndaakademían hefur tilnefnt leikkonuna Helen Mirren til BAFTA verðlauna í ár og leikstjórinn Stephen Frears fær einnig tilnefningu fyrir að leikstýra Mirren í kvikmyndinni The Queen sem hefur hlotið flestar tilnefningar til verðlauna eða 10 talsins. Bond-myndin Casino Royale hlýtur níu tilnefningar, þar á meðal er hinn nýji Bond, Daniel Craig.
BAFTA (British Academy of Film and Television Arts) hátíðin verður síðan haldin í konunglegu óperunni í Covent Garden í London þann 11. febrúar næst komandi. Fréttavefur BBC skýrir frá því að þessu sinni verði brotið blað í sögu verðlaunaafhendingarinnar því leikarinn og rithöfundurinn Stephen Fry mun ekki kynna hana eins og hann hefur gert undanfarin sex ár en þetta er einnig afmælishátíð því þetta er í sextugasta sinn sem verðlaunin verða afhent.
Fréttin er fengin af vefnum www.mbl.is