Spennuþáttaröðin Katla hefur verið á margra vörum víða um heim. Um 36% Íslendinga hafa horft á alla þættina á Netflix og 20% hafa byrjað að horfa á þá. Þetta kemur fram í nýrri könnun Prósents, sem framkvæmd var dagana 24. júní til 30 júní.
Um 29% Íslendinga telja að þau muni horfa á þættina og aðeins 15% ætla líklega ekki að horfa á þá. Konur eru marktækt líklegri til að hafa horft á þættina en karlar, en 41% kvenna höfðu klárað alla þættina en aðeins 31% karla.
Meirihluti svarenda telja þættina vera góða, en á skalanum 1-5 gáfu Íslendingar þáttunum 4 í einkunn. Af þeim sem horft höfðu á þættina töldu 78% þættina vera góða, 15% töldu þá vera hvorki góða né slæma og 7% töldu þá vera slæma. Lítill munur var á einkunnargjöf á milli hópa, en konur voru aðeins ánægðari en karlar og fólk á landsbyggðinni töldu þættina vera betri en fólk á höfuðborgarsvæðinu.
