James McAvoy þarf vart að kynna. En margur hváði líklega þegar tilkynnt var að í nýjustu X-Men myndinni, First Class, færi hann með hlutverk Charles Xavier, hins hógværa og hugulsama leiðtoga sem leikinn hefur verið af Patrick Stewart. Búið ykkur undir að kynnast yngri, hrokafyllri og ráðvilltari Xavier.

HINN UNGI XAVIER

Þú ert þekktur fyrir að vera algjör njörður. Er þetta þá draumarullan?

Merkilegt nokk þá elskaði ég X-Men teiknimyndina en ekki teiknimynda-sögurnar. Teiknimyndasögur voru ekkert vinsælar í Skotlandi á mínum uppvaxtarárum, eða allavega ekki í vinahópnum mínum í Glasgow. Ég og vinur minn horfðum mikið á teiknimyndina og Gambit var uppáhaldspersónan mín. Hann var bara svalur.

Ekki Xavier sem sagt.

Það er erfiðara fyrir unga krakka að samsama sig með honum held ég. En ég er svolítill Star Trek aðdáandi og það að fá að leika ungan Patrick Stewart er mjög gaman.

Hversu mikið af hans túlkun notfærir þú þér í þinni?

Í sannleika sagt ekki mikið. Það góða við að gera eitthvað svona er að við fáum að sjá hvernig þeir urðu eins og þeir eru. Ég byrjaði að pæla í persónunni út frá því hvernig Bryan Singer og Patrick Stewart túlka hana. Sú persóna er svolítill munkur. Hann er óeigingjarn, eiginlega eins og dýrlingur. Mér finnst hann sannur leiðtogi, yfirmaður og leiðtogi X-mannanna. Ég vildi gera eitthvað öðruvísi við persónuna, eitthvað andstætt því sem hann svo verður. Gera hann sem sagt ekki að munki.

Þannig að það eru pínu stælar í þessum Charles?

Hann er fullur af stælum. Hann er mjög ánægður með sjálfan sig. Í hinum myndunum er hann laus við allan hroka, þannig að sjá hann

hrokafullan er mjög áhugavert. Hann misnotar ekki krafta sína beint en hann les í huga kvenna ef hann heldur að þær séu hrifnar af sér. Hann les tildæmis hug stelpu, finnur út hvað henni finnst best að drekka og pantar það svo fyrir hana, svoleiðis eitthvað. Hann er með kenningu um erfðastökkbreytingu sem hann heillar ungar stúdínur í Oxford með. Svo förum við að sjá stælana minnka og minnka.

En er hann kominn með tilgang sinn á hreint þegar við kynnumst honum í myndinni?

Tilgangsfræinu hefur verið sáð. Áður en hann kynntist Raven (Darkholme, sem Jennifer Lawrence leikur og Xavier vingast við sem barn) hélt hann að hann væri algjörlega einn á báti. Þau vita ekki að það finnast fleiri eins og þau, hvað þá heill kynþáttur stökkbreyttra einstaklinga. Þannig að kynnast henni er honum ákveðinn innblástur. Við gefum í skyn að hann hitti ekki aðra stökkbreytta manneskju fyrr en hann kynnist Erik. Og þegar hann notar Cerebri fattar hann að það eru hundruð þúsunda stökkbreyttra í heiminum og þeir eru ekki allir heildstæðir meðlimir í samfélagi mannanna. Þau eru ein á báti. Það hreyfir við honum. Ofurkraftur hans er að hann getur séð allt í einhverjum, veikleika þeirra, möguleika, styrkleika – hann þarf ekki samkennd. Hann upplifir sársauka þeirra og það gefur honum tilgang. Hann vill hjálpa þessum einstaklingum því í raun eru þau öll hrædd og einmana.

Í upprunalegu myndunum fær maður á tilfinninguna að hann hafi stofnað X-mennina af mikilli hugsjón.

Ég held að þeir verði til af brýnni þörf en við lok myndarinnar finnur hann hugsjónina. Þau upplifa sig ekki sem ofurhetjur held ég. Þau eru bara öðruvísi.

Þau berjast ekki endilega gegn glæpum.

Nei, þau berjast aðallega við hvort annað. Þetta er hálfgerð borgarastyrjöld! Það er barist beinlínis linnulaust. Ég held að það hafi heillað mig mest, að sýna að þetta eru ekki ofurhetjur. Þau hafa tekið að sér mun meira en þau ráða við, en hver annar ætti að gera þetta?

Sérðu fyrir þér feiri First Class myndir?

Ef af þeim verður, sem maður vonar, þá er það mjög áhugaverð þróun. Það býður upp á margt spennandi. Í Wanted hafði ég ekki hugmynd um hvernig maður gæti þróað persónuna áfram í framhaldsmynd. En í þessari veit ég nákvæmlega hvað ég myndi gera ef að því verður.

Myndir þú vilja sjá Xavier á nýjum áratug?

Ég held að hugmyndin sé að staðsetja aðra myndina á áttunda áratugnum. Það væri frábært að sjá þá þróun. Ég meina, hvað gerðu þau af sér á tímabili hinna frjálsu ásta? (hlær)

Þýðing: Kolbrún Björt Sigfúsdóttir.

42 myndir mánaðarins