Andhetjan Venom í fyrstu stiklu og plakati

Fyrsta stikla í fullri lengd er komin út fyrir ofurhetjukvikmyndina Venom með Dunkirk stjörnunni Tom Hardy í titilhlutverkinu.

Stiklan, og Venom sjálfur þá sérstaklega, lítur vel út,  en Venom, eða Eddie Brock eins og hann heitir, er fréttaljósmyndari, sem kemst í kynni við sníkjudýr utan úr geimnum, sem tekur sér bólfestu í honum. Venom birtist fyrst í teiknimyndasögum sem hálfgert yfirtökusjálf Köngulóarmannsins, þ.e. Venom búningurinn lagðist yfir Spider-Man og yfirtók hann. Þetta gerðist fyrst í 252. hefti The Amazing Spider Man frá árinu 1984. Nokkrum árum síðar fór þessi vera úr Peter Parker, og yfir í ljósmyndarann Eddie Brock, og úr varð andhetjan Venom. Síðan þá hefur Venom birst í ýmsum myndum, og tekið sér bústað í ýmsum hýslum. Við sáum Venom síðast á hvíta tjaldinu í túlkun Topher Grace í Spider-Man 3 eftir Sam Raimi. Allar götur síðan sú mynd var frumsýnd árið 2007 hafa verið uppi sögusagnir um sérstaka Venom mynd, en allar tilraunir hafa hingað til farið út um þúfur, þar til nú.

Aðrir helstu leikarar eru Michelle Williams og Woody Harrelson. Myndin kemur í bíó hér á Íslandi 5. október.

Sjáðu stikluna hér fyrir neðan og nýtt plakat þar fyrir neðan: