Fyrsta sýnishornið úr Lost River (áður How To Catch a Monster) var opinberað í dag, en myndin er frumraun Ryan Gosling sem leikstjóra. Lost River er sögð fjalla um einstæða móður sem er rifin inn í myrka undirheima á meðan unglingssonur hennar uppgötvar veg sem leiðir hann að leyndri borg neðansjávar.
Gosling var hér á landi síðasta sumar ásamt kærustu sinni Evu Mendez. Ástæðan var sú að Gosling var að vinna með Valdísi Óskarsdóttur, en hún sá um að klippa myndina. Valdís hefur áður unnið við myndir á borð við Eternal Sunshine of the Spotless Mind og Finding Forrester.
Myndin skartar meðal annars Christinu Hendricks í aðalhlutverki auk Saoirse Ronan og Eva Mendez. Matt Smith sem leikur í bresku þáttunum Doctor Who leikur einnig þýðingarmikið hlutverk í myndinni.
Hér að neðan má sjá fyrsta sýnishornið úr Lost River.
