Woo vill leikstýra The Expendables 3

John Woo hefur áhuga á að leikstýra þriðju Expendables-myndinni. Simon West sem áður leikstýrði Con Air var við stjórnvölinn í The Expendables 2.

„Hún var mjög vinsæl í Kína og fjölmiðlar fjölluðu mikið um hana. Þetta var frábær mynd sem ég horfði á með fjölskyldunni minni. Ég elska allan hasarinn og  Van Damme var trúverðugt illmenni,“ sagði hinn kínverski Woo um The Expendables 2.

Hann sagðist hafa lesið um að aðdáendur hans vilji að hann leikstýri þriðju myndinni. „Ég er mikill aðdáandi þessara stráka og hef áhuga á henni en ég vil ekki að kvikmyndaverið og framleiðandinn andi ofan í hálsmálið á mér. Ég myndi vilja gera myndina eins og ég vil hafa hana,“ sagði hann og bætti við að myndin myndi gerast í Kína.

Á ferilsskrá Woo eru hasarmyndir á borð við Face/Off, Mission Impossible 2 og Broken Arrow.