Fincher í viðræðum vegna Jobs

Leikstjórinn David Fincher er í viðræðum um að gera nýja kvikmynd um stofnanda Apple, Steve Jobs. Kvikmyndin yrði byggð á ævisögu Jobs, eftir Walter Isaacson. Bókin hefur selst í bílförmum og var stórfyrirtækið Sony ekki lengi að eigna sér kvikmyndaréttinn.

Fincher hefur áður gert mynd um tölvusnillinginn Mark Zuckerberg og hefur handritshöfundur The Social Network, Aaron Sorkin, þróað ævisöguna um Jobs yfir á hvíta tjaldið. Framleiðendur myndarinnar um Zuckerberg myndu þá einnig standa á bakvið myndina um Jobs.

steve_jobs_david_fincher_split

Það er ekki langt síðan kvikmyndin Jobs, með Ashton Kutcher í titilhlutverkinu var frumsýnd. Myndinni var ekki vel tekið og er Kutcher tilnefndur til Razzie-verðlauna fyrir frammistöðu sína.

Búist er við allt öðruvísi nálgun frá meistara Fincher á viðfangsefnið og á hann að baki kvikmyndir á borð við Seven, Fight Club og Zodiac.

Sagan um Steve Jobs er stórmerkileg og fékk hann snemma áhuga á tölvum. Jobs stofnaði Apple fyrirtækið í bílskúrnum heima hjá sér aðeins 21 ára gamall ásamt Steve Wozniak árið 1976. Fyrstu tölvur þeirra Apple I og Apple II komu svo á markað ári seinna.

Það var svo árið 1996 að Steve tók aftur við forstjórastöðu Apple og hefur uppgangur fyrirtækisins verið með ólíkindum síðan. Steve stóð fyrir þróun og uppbyggingu á tækjum eins og iMac, iPod, iPhone og iPad sem skilað hafa fyrirtækinu methagnaði hvað eftir annað.