Breska póstþjónustan Royal Mail ætlar að gefa út sérstök Star Wars-frímerki í tilefni myndarinnar Star Wars: The Force Awakens, sem er væntanleg í bíó í desember.
Frímerkin verða gefin út í næsta mánuði og var það breski listamaðurinn Malcolm Tween sem hannaði þau, að því er BBC greindi frá.
Yoda, Han Solo, Leia prinsessa, Logi geimgengill og að sjálfsögðu Svarthöfði eru á meðal þeirra sem komust á frímerkin.
Auk persóna úr Star Wars eru sex frímerki með alls kyns farartækjum úr myndunum, þar á meðal Millenium Falcon.
