Sverðkunnátta leikarans Miltos Yerolemou í þáttunum Game of Thrones hefur greinilega vakið athygli framleiðanda nýjustu Star Wars-myndarinnar því Yerolemou hefur verið staðfestur í leikarahóp myndarinnar.
Yerolemou lék Syrio Forel í fyrstu þáttaröðinni og er annar leikarinn úr Game of Thrones sem fær hlutverk í myndinni, en Gwendoline Christie var fengin til liðs við myndina fyrir nokkrum mánuðum. Þeir sem þekkja til þáttanna ættu að kannast við hana í hlutverki Brienne of Tarth.
Samkvæmt BBC þá mun Yerolemou ekki vera með stórt hlutverk í myndinni. Netverjar eru þó margir á því að Yerolemou muni munda geislasverð í sjöundu Star Wars-myndinni.
Star Wars: Episode VII er væntanleg í kvikmyndahús þann 18. desember, 2015, og á að gerast 30 árum eftir að Return of the Jedi gerðist. J.J. Abrams leikstýrir.