Hliðarmynd ( spinoff ) af myndinni The Heat sem fékk mikla aðsókn í bíó á síðasta ári, er á leiðinni. Aðalpersónur verða persónurnar sem Jamie Denbo og Jessica Chaffin léku í Heat.
Paul Feig leikstýrði The Heat og Katie Dippold skrifaði handritið. Melissa McCarthy og Sandra Bullock léku aðalhlutverkin, en myndin þénaði 230 milljónir Bandaríkjadala í bíó á alheimsvísu.
Denbo og Chaffin léku þær Beth og Gina, sem voru hluti af fjölskyldu persónu McCarthy.
Fyrir þá sem sáu myndina þá er þetta liðið sem sat í kringum eldhúsborðið og baunaði spurningum á persónu Bullock, m.a. um hvort að hún væri karlmaður, og ef hún væri karl hvernig hún gæti rakað sig svona vel. „Jamie og Jessica eru tvær af fyndnasta fólki í heimi,“ sagði Feig. „Þær léku lítil hlutverk í The Heat og breyttu þeim í persónur sem eiga skilið að fá sérstaka bíómynd um sig. Ég get ekki beðið eftir að kynna Beth og Gina fyrir heiminum. Forðið ykkur.“