Grimmd frumsýnd í fullu Smárabíói

Fjölmenni var á frumsýningu nýrrar íslenskrar glæpamyndar, Grimmd, í Smárabíói nú fyrr í kvöld, að viðstöddum leikurum myndarinnar, leikstjóra og öðrum aðstandendum.

2016-10-18-19-46-12

Anton Sigurðsson leikstjóri og Haraldur Bjarni Óskarsson framleiðandi.

Áhorfendur fylltu fjóra sali Smárabíós og fylgdust með því þegar rannsóknarlögreglumennirnir  Edda Davíðsdóttir og Jóhannes Schram rannsökuðu dauða tveggja systra sem finnast í Heiðmörk. Önnur stúlkan ber merki um langvarandi misnotkun og því beinist rannsóknin fljótt að ýmsum dæmdum barnaníðingum. Áhorfendur eru leiddir frá einum þeirra til annars og haldið í óvissu um hver þeirra framdi glæpinn, fram á síðustu mínútu. Inn í þetta fléttast einnig persónuleg mál Eddu.

2016-10-18-19-40-01

Anton Sigurðsson leikstjóri hélt stutta ræðu fyrir sýninguna og rakti þar meðal annars hvernig hann heillaðist af kvikmyndagerð þegar verið var að taka myndina Stikkfrí í Hafnarfirði, heimabæ hans, þegar hann var níu ára gamall. Allir krakkarnir í skólanum vildu fá að leika í myndinni, og hann sömuleiðis. Þá sagði hann áhorfendum frá því þegar hann fór á stuttmyndanámskeið sem unglingur, og hvernig hann fékk þann stóra dóm frá ónefndum aðila í kjölfarið að hann ætti að láta frekari kvikmyndagerð eiga sig í framtíðinni.

Anton helgaði þessum aðila ( sem hann sagði að væri í staddur í salnum)  þessa nýju mynd, Grimmd, og óskaði fólki síðan góðrar skemmtunar!

Sjáðu stiklu úr myndinni hér að neðan: