Síminn stoppaði ekki í 5 ár

Á sunnudagskvöldið 11. nóvember kl. 2015 hefst á RÚV þáttaröðin Íslensku björgunarsveitirnar sem fjallar um íslensku björgunarsveitir Slysavarnafélagsins Landsbjargar og störf þeirra. Þættirnir eru fjórir talsins og í gegnum þá er veitt innsýn inn í líf og störf björgunarsveitarfólks og áhorfendur leiddir í allan sannleikann um hvað gengur á í stórum og umfangsmiklum björgunaraðgerðum.

Í tilkynningu frá Sagafilm kemur fram að Sagafilm hefur fylgst með björgunarsveitunum í fimm ár og myndað valin útköll á því tímabili. „Útköll á björgunarsveitir eru að meðaltali 2 til 3 daglega á landsvísu og oft er um að ræða aðgerðir þar sem um líf eða dauða er að tefla. Ótrúlega mikið og öflugt starf liggur að baki sterkri björgunarsveit en starfið er sjálfboðaliðastarf og eru hátt í 4000 manns á útkallsskrá á landsvísu. Um 18.000 einstaklingar eru meðlimir í samtökunum Slysavarnafélagið Landsbjörg sem gerir það eitt af stærstu sjálfboðaliðasamtökum á Íslandi.“

Fóru á útkallsskrá

Framleiðendur og leikstjóri þáttanna ákváðu í upphafi þessa metnaðarfulla verkefnis að fara á útkallsskrá íslensku björgunarsveitanna og því hefur síminn þeirra ekki stoppað síðustu fimm árin.  Nú býr Sagafilm yfir 350 klukkustundum af myndefni frá á annað hundrað útköllum víðs vegar um landið á tímabilinu ágúst 2007 til ágúst 2012.

„Það er vægt til orða tekið að segja að blóð, sviti og tár liggi að baki þáttaröð sem þessari en verkefnið er eitt það stærsta sem Sagafilm hefur tekið að sér frá stofnun fyrirtækisins,“ segir í tilkynningu Sagafilm.