Eldfjall Rúnars keppir í Cannes

Eldfjall, fyrsta kvikmynd Rúnars Rúnarssonar leikstjóra, verður frumsýnd á kvikmyndahátíðinni í Cannes 13. maí. Eldfjall keppir bæði í flokknum Directors Fortnight og um Camera d´Or verðlaunin, að því er fram kemur í fréttatilkynningu frá framleiðanda myndarinnar.

Kvikmyndahátíðin í Cannes fer fram dagana 11. til 22. maí og er þetta í annað skiptið sem íslensk mynd er valin í flokkinn Directors Fortnight. Atómstöðin í leikstjórn Þorsteins Jónssonar keppti í þeim flokki árið 1984.

Flokkurinn Directors Fortnight hóf göngu sína árið 1969 sem hliðarkeppni á kvikmyndahátiðinni í Cannes. Margir heimsþekktir leikstjórar hafa stigið sín fyrstu skref í þeim flokki. Þar á meðal eru George Lucas, Martin Scorsese, Francis Ford Coppola, Spike Lee og Ang Lee.

Myndir sem slegið hafa eftirminnilega í gegn í þessum flokki eru meðal annars Billy Elliot, The Blair Witch Project og The Virgin Suicides í leikstjórn Sofia Coppola.

Eldfjall keppir einnig um hin virtu Camera d´Or verðlaun en þau eru veitt fyrir bestu fyrstu kvikmynd leikstjóra.

„Kvikmyndin Eldfjall fjallar um Hannes, 67 ára gamlan mann sem er að komast á eftirlaunaaldur. Hann er karlmaður af gamla skólanum, einangraður frá fjölskyldunni og heimilinu og þarf nú að takast á við nýtt hlutverk í lífinu. Eldfjall er þroskasaga manns sem þarf að takast á við val fortíðarinnar og erfiðleika nútímans til að eiga möguleika á framtíð,“ segir í tilkynningunni.

Með aðalhlutverk í Eldfjalli fara Theodór Júlíusson, Margrét Helga Jóhannsdóttir, Elma Lísa Gunnarsdóttir og Þorsteinn Bachmann.

Rúnar Rúnarsson leikstjóri útskrifaðist frá Danska Kvikmyndaskólanum árið 2009. Stuttmyndir hans Smáfuglar, Anna og Síðasti bærinn hafa farið sigurför um heiminn og unnið um eitthundrað alþjóðleg kvikmyndaverðlaun, að því er fram kemur í tilkynningunni.

Anna keppti í flokki stuttmynda í Directors Fortnight árið 2009, Smáfuglar keppti um Gullpálmann í flokki stuttmynda árið 2008 og Síðasti bærinn var tilnefnd til Óskarsverðlauna í flokki stuttmynda árið 2006.

Kvikmyndin Eldfjall er íslensk/dönsk samframleiðsla Zik Zak Kvikmynda og Fine & Mellow í Danmerku. Myndin var styrkt af Kvikmyndamiðstöð Íslands, New Danish Screen, Nordic Film & TV Fond með stuðningi frá Iðnaðarráðuneytinu. Myndin er framleidd af Þóri Snæ Sigurjónssyni, Skúla Fr. Malmquist og Egil Dennerline.

Eldfjall var tekin upp á Íslandi haustið 2010.