Disney er ekki fyrr búið að frumsýna myndina Oz The Great And Powerful, sem er forsaga hinnar þekktu sögu um galdrakarlinn frá Oz, en byrjað er að hugsa um framhaldsmynd.
Oz The Great and Powerful verður frumsýnd nú um helgina í Bandaríkjunum og á Íslandi, en myndin hefur verið að fá góða dóma gagnrýnenda sem séð hafa myndina á forsýningum.
Reyndar hefur, samkvæmt Empire kvikmyndaritinu, framhaldsmynd verið í undirbúningi í nokkra mánuði og handritshöfundurinn Mitchell Kapner löngu byrjaður að vinna í framhaldshugmyndum.
Empire segir frá því að þetta þýði þó ekki endilega að framhaldsmynd verði gerð á endanum, heldur sé það yfirleitt þannig með stórar og dýrar myndir að farið er af stað með undirbúning að framhaldsmynd áður en fyrsta myndin er frumsýnd, til vonar og vara ef svo færi að fyrri myndin myndi slá í gegn.
Í Oz The Great And Powerful leika helstu hlutverk þau James Franco, Mila Kunis, Rachel Weisz, Michelle Williams og Zach Braff, en Sam Raimi leikstýrir.
