Framhald að Knocked Up í bígerð

Tímaritið Variety greinir frá því að leikstjórinn sívinsæli Judd Apatow undirbúi framhald að stórsmellinum Knocked Up frá árinu 2007. Apatow, sem er maðurinn bakvið myndir á borð við 40-Year Old Virgin og Funny People, leikstýrði sem og skrifaði Knocked Up en hún sló allsvakalega í gegn og varð næsttekjuhæsta mynd leikstjórans. Framhaldið af henni verður óbeint og mun fjalla um persónur þeirra Paul Rudd og Leslie Mann, en þau léku einmitt tengdabróður og systur persónu Katherine Heigl í fyrri myndinni.

Ekki er enn vitað hvort Heigl og Seth Rogen muni snúa aftur í hlutverk sín úr fyrri myndinni en samkvæmt Variety stefnir Apatow á að koma framhaldinu á hvíta tjaldið í byrjun júní á næsta ári.

– Bjarki Dagur