Benjamin Hunter er lifandi eftirmynd föður síns -Travolta

Kelly Preston, leikkona og eiginkona leikarans John Travolta, sagði á G – dags hátíðarhöldunum í Los Angeles um helgina, að hinn stolti faðir, syngi stöðugt fyrir hinn nýfædda son þeirra hjóna, Benjamin Hunter Kaleo Travolta, sem fæddist í nóvember sl.

Eins og menn muna dansaði John Travolta og söng eftirminnilega í hinni sígildu Grease.

John Travolta, sem er 56 ára gamall, sagði: „Ég bý bara til bulllög. Ég var að skipta á honum um daginn, og ég vildi gera eitthvað skemmtilegt fyrir hann, svo hann færi ekki að gráta, þannig að ég bullaði bara eitthvað lag,“ sagði Travolta hæstánægður með nýja soninn.

Travolta bætti um betur og söng lagið fyrir blaðamenn: „Benjamin Hunter, that’s my name! Benjamin Hunter, that’s my name! Benjamin Hunter. Ba ba bum. Ba ba bum!“

Massa lag hjá karlinum.

Hjónin voru þó ekki með guttann með sér í G-dags partíinu, og skildu hann þess í stað eftir heima hjá systur sinni Ella Blue, sem er 10 ára, og barnfóstru. „Ég hringdi heim þrisvar sinnum á síðasta klukkutíma, og hann hefur það gott,“ sagði Preston. „Ella elskar Benjamin,“ sagði Travolta, um dóttur þeirra.

Preston, sem er orðin 48 ára, bætti því við þarna að stráksi væri eins og snýttur út úr nösunum á pabba sínum; þeir væru næstum því eins og eineggja tvíburar, svo líkir væru þeir.