Eins og flestir muna eftir var grínistinn Ricky Gervais kynnir á Golden Globe verðlaunahátíðinni nú fyrir stuttu. Þetta var í annað árið í röð sem Gervais kynnti hátíðina, en á meðan flestum áhorfendum fannst hann standa sig með prýði voru stjörnurnar í Hollywood margar ósáttar með kappann. Gervais var ekkert að skafa af hlutunum og gerði miskunnarlaust grín að þeim frægu og ríku.
Í nýlegu viðtali við tímaritið Heat Magazine sagði Gervais, „Áhorfið jókst gríðarlega og þeir báðu mig að koma aftur á næsta ári. Ég held ég ætti að sleppa því, ég veit ekki hvað ég gæti gert betur. Þið þekkið mig, ég læt tvær seríur alltaf nægja.“
Meðal þeirra sem Ricky Gervais hraunaði yfir á hátíðinni voru Charlie Sheen og Tim Allen, en leikstjórinn Judd Apatow var meðal þeirra sem gagnrýndu grínistann breska harkalega fyrir heldur ósmekklega brandara sína.
– Bjarki Dagur
