Orðrómur um Green Lantern 2 er "kjaftæði"

Handritshöfundurinn Marc Guggenheim hefur vísað til föðurhúsanna orðrómi um að  Green Lantern 2 sé í undirbúningi.

Guggenheim var sagður einn þeirra höfunda sem væru að semja handritið að framhaldsmyndinni en hann segir þessar sögusagnir „algjört kjaftæði“ í svarpósti sem hann sendi Comicbook.com.

Leikaraliðið úr fyrstu myndinni, þar á meðal Ryan Reynolds, Blake Lively, Mark Strong og Geoffrey Rush átti að taka þátt í framhaldinu.

Green Lantern kom út í fyrra og fékk heldur misjafna dóma.