Nýrri hrollvekju lýst sem tilfinningalegu hryðjuverki

Ný hrollvekja er á leiðinni ( hún er reyndar ekki með útgáfudag á Íslandi ennþá ) sem lýst hefur verið sem mest hrollvekjandi kvikmynd sem komið hefur í bíó í áraraðir, og hefur verið kölluð Særingarmaður ( The Exorcist ) nýrrar kynslóðar.

Myndin, sem heitir Hereditary, eða Arfgengi, í lauslegri íslenskri snörun, er nú sú mynd sem hrollvekjuunnendur bíða með hvað mestri eftirvæntingu eftir að sjá, eftir að gagnrýnendur sem séð hafa ræmuna, hafa lokið á hana miklu lofsorði.

Leikur Toni Collette í aðalhlutverkinu er lofaður í hástert, en Collette leikur konu í fjölskyldu þar sem að djöflar búa í erfðamengi fjölskyldunnar.

Einn gagnrýnandi, Bustle, sagði myndina “ólíka öllu sem þú hefur séð áður” og The AV Club kallaði myndina hreinræktuð tilfinningahryðjuverk.

Kvikmynd kemur í bíó í Bandaríkjunm 8. júní nk. og í Bretlandi viku síðar.

Í fimm stjörnu dómi í breska blaðinu The Guardian, segir Peter Bradshaw: “Hreditary þrefaldaði hjartsláttinn hjá mér, lét mig fá gæsahúð á hvirflinum, læknaði þrálátan hiksta – og í einu orði sagt skaut mér verulega skelk í bringu.”

Hann bætti við með tilvíun í verðlaunahátíðir næsta árs: “Það er klárt mál að þessi magnaða leikkona [ Collette ] mun fá eitthvað skraut á hilluna sína í febrúar.”

Handritshöfundurinn Ari Aster fær einnig mikið hrós. Í Vox segir Alissa Wilkinson: “Í fyrsta skipti sem ég sá Hereditary þá veinaði ég oft, og skreið næstum því undir sætið einu sinni eða tvisvar.”

Og áfram hélt hún: “Fyrst upplifir þú hreinan hrylling, en svo fer þetta að blandast við ógeð og óhug, sem magnast svo þegar á líður.”

Kíktu á stikluna hér fyrir neðan, ef þú þorir!