Hasargamanmyndin Leynilögga hefur verið valin í aðalkeppni kvikmyndahátíðarinnar í Locarno, sem fram fer í Sviss dagana 4. – 14. ágúst.
„Að frumsýna myndina á virtri hátíð eins og Locarno er sérstakur heiður fyrir okkur öll sem komum að myndinni. Þar sem lítið hefur verið um kvikmyndahátíðir vegna Covid er óvanalega mikill fjöldi mynda sem reynir að komast að á hátíðum og því er það mikil viðurkenning að vera valin,“ segir Lilja Ósk Snorradóttir framleiðandi í tilkynningu frá Pegasus.
Það er Hannes Þór Halldórsson sem leikstýrir Leynilöggu en myndin keppir í aðalkeppni hátíðarinnar sem nefnist Concorso internazionale og keppir um Gyllta hlébarðann eða Pardo d’Oro. Þykir hann vera á meðal virtustu kvikmyndaverðlauna sem veitt eru ár hvert. Locarno hátíðin er ein helsta hátíð Evrópu og fer hún nú fram í 74. skipti.
Leynilögga fjallar um grjótharða ofurlöggu sem er í baráttu við sjálfan sig á sama tíma og hann berst við hættulegustu glæpamenn landsins.
Myndin verður frumsýnd hér á landi 27. ágúst í Sambíóunum.
