Lagið Húsavík úr kvikmyndinni Eurovision Song Contest: The Story of Fire Saga er á stuttlista fyrir tilnefningar til Óskarsverðlaunanna, en tilkynningar verða opinberaðar 15. mars næstkomandi. Stuttlistinn umræddi var birtur í gær en þar kemur einnig fram stuttmyndin Já fólkið eftir Gísla Darra Halldórsson.
Já fólkið hefur vakið mikla athygli víða á undanförnum mánuðum og sópað til sín verðlaunum. Teiknimyndin var sýnd á RIFF í fyrra og hlaut þar viðurkenningu fyrir bestu íslensku stuttmyndina, auk þess að hafa hlotið verðlaun á Fredrikstad Animation Festival og verðlaun yngstu áhorfendanna (Children’s Choice Award) á Nordisk Panorama.
Þá vann hún einnig í flokki Bestu evrópskrar stuttmyndar á 3D Wire, en sú hátíð er haldin árlega á Spáni og er með þeim stærri í Evrópu þar sem áhersla er lögð á tölvuleiki, teiknimyndir og ýmiss konar nýmiðla. Dómnefndir hafa sérstaklega hrósað stíl, húmor og enduráhorfunargildi teiknimyndarinnar.
Sjá einnig: Teiknimynd Gísla sópar til sín verðlaunum: „Hugsa að South Park hafi eitthvað spilað inn í þetta“
Á stuttlistanum í flokki bestu upprunalegu tónlistar í kvikmynd eru alls 15 lög en akademían hafði úr 105 lögum að velja.
Savan Kotecha, Rickard Göransson og Fat Max Gsus eru höfundar lagsins Húsavík en lagið er flutt af Molly Sandén og leikaranum Will Ferrell.