Ingvar Sigurðsson aðalleikari kvikmyndarinnar Hvítur, hvítur dagur eftir Hlyn Pálmason hlaut leikaraverðlaunin á kvikmyndahátíðinni í Transylvaníu í Rúmeníu í gærkvöldi. Þetta kemur fram í tilkynningu frá framleiðendum. Þetta er því önnur hátíðin í röð þar sem Ingvar hlýtur verðlaun fyrir leik sinn í myndinni, en fyrir rúmum tveimur vikum hlaut hann verðlaun á kvikmyndahátíðinni í Cannes þar sem myndin var heimsfrumsýnd.
Einn annar leikari hlaut verðlaun á hátíðinni í Transylvaníu en það var hinn heimsþekkti Nicolas Cage sem var verðlaunaður fyrir framlag sitt til kvikmyndalistarinnar.
Hlynur vann í fyrra
Í tilkynningu er þess getið einnig að Hlynur Pálmason hafi hlotið verðlaun á hátíðinni í Transylvaníu á síðasta ári, þá fyrir bestu leikstjórn fyrir fyrstu kvikmynd sína, hina dönsk/íslensku Vetrarbræður sem kom út árið 2017 og fór sigurför um heiminn í kjölfar heimsfrumsýningar í aðalkeppni Locarno kvikmyndahátíðarinnar í Sviss.
Hvítur, hvítur dagur hefur samkvæmt tilkynningunni hlotið mikið lof og fengið frábæra dóma hjá hinum ýmsu virtu kvikmyndatímaritum á borð við Cineuropa, Screen International og The Hollywood Reporter. Þá eru gagnrýnendur sagðir hafa farið fögrum orðum um leik Ingvars: „Ingimundur er heillandi og áhugaverður karakter, meistaralega dreginn upp af Ingvari Sigurðssyni“ segir t.a.m. í Screen International, og enn fremur að myndin sjálf sé „sjónrænt grípandi og áhrifamikil“.
Grípur til róttækra aðgerða
Myndin fjallar um lögreglustjórann Ingimund sem hefur verið í starfsleyfi frá því að eiginkona hans lést óvænt af slysförum. Hann einbeitir sér að því að byggja hús fyrir dóttur sína og afastelpu, þar til athygli hans beinist að manni sem hann grunar að hafi átt í ástarsambandi við konu sína. Fljótlega
breytist grunur Ingimundar í þráhyggju og leiðir hann til róttækra gjörða sem óhjákvæmilega bitnar einnig á þeim sem standa honum næst.
Myndin er framleidd af Join Motion Pictures og Sena sér um dreifingu hennar á Íslandi.
Hvítur, hvítur dagur verður frumsýnd í kvikmyndahúsum á Íslandi 6. september.
Sjáðu Ingvar taka við verðlaununum hér fyrir neðan:
