Við greindum frá því í gær að nýtt plakat fyrir hryllingsmyndina Slender Man væri komið út og í framhaldinu myndi framleiðslufyrirtækið Sony birta fyrstu stikluna úr myndinni. Plakatið var óhugnanlegt og stiklan sem birt var fyrir skömmu er heldur ekkert slor þegar það kemur að hryllingsefni.
Í byrjun stiklunnar heyrum við í manni sem er að leita að dóttir sinni sem virðist hafa týnst í skógi. Eftir það sjáum við nokkrar stúlkur sem virðast vera í geðshræringu. T.a.m situr ein stelpa í skólastofu og stingur hníf í höfuðið á sér. Önnur stelpa liggur á spítalarúmi öskrandi. Sú þriðja sér fyrirbærið í skóginum og gengur síðan þaðan frá föl og með blóð í munnvikunum.
Myndin mun fjalla, eins og titilinn gefur að kynna um myrkrarveruna „Slender Man“ sem er mjóslegin, myrk vera sem birtist fyrst á myndum, teikningum og greinum á internetinu árið 2009.
Fyrirbærið hefur vakið mikla athygli eftir að tvær tólf ára stúlkur í Bandaríkjunum stungu bekkjarsystur sína 19 sinnum til að þóknast persónunni árið 2014. Stúlkurnar frömdu árásina til heiðurs teiknimyndapersónunni sem þær höfðu lesið smásögu um skömmu áður en þær frömdu ódæðið.
Myndin verður frumsýnd hér á landi þann 18. maí næstkomandi. Stikluna má sjá í spilaranum hér að neðan.