Baráttumyndir óskast á RIFF

loftAlþjóðleg kvikmyndahátíð í Reykjavík, RIFF, mun eins og undanfarin ár standa fyrir einnar mínútu örmyndasamkeppni í samstarfi við Loft Hostel. Þemað að þessu sinni er BARÁTTA og hafa þátttakendur algjörlega frjálsar hendur hvernig þeir túlka þetta margræða þema. Einu skilyrðin eru að myndin sé akkúrat ein mínúta að lengd.

RIFF er líkt og undanfarin ár í samstarfi við hollensku kvik­mynda­sam­tök­in The One Minu­tes. Samtökin hafa fram­leitt og dreift meira en þúsund einn­ar mín­útu mynd­um eft­ir fólk af 120 þjóðern­um og mun RIFF sýna einnar mínútu myndir frá þeim víðsvegar um Reykjavík og Kópavog á hátíðinni í haust.

Í tilkynningu frá RIFF kemur fram að í bæði skiptin sem keppnin hafi verið haldin hafi þátttaka verið geysigóð og upprennandi kvikmyndagerðarfólk sent inn verk sín í hrönnum.

Þær innsendu myndir sem dómnefnd telur bestar verða frumsýndar á verðlaunafhendingu á Loft Hostel þann 26. september næstkomandi. Þá verður myndin sem hreppir fyrsta sætið sérstaklega verðlaunuð. Bestu myndirnar verða svo sýndar á völdum stöðum á meðan á hátíðinni stendur.

Frestur til að senda inn myndir er til 11. september. Til að öðlast þáttökurétt er nægilegt að senda youtube eða vimeo hlekk með myndinni og lykilorði á netfangið einminuta@riff.is. Einnig skal fylgja nafn þess sem gerir myndina og aldur.

Fyrri sigurvegarar:

2013
Erlendur Sveinsson fyrir myndina Breathe (þema: „Loft“)

Breathe(one minute short film) from Erlendur Sveinsson on Vimeo.

2014:
Logi Leó Gunnarsson fyrir myndina Hringur (þema: „Deep Blue“)

Hringur from Logi Leó Gunnarsson on Vimeo.

Stikk: