Fyrirlestur um dreifingu kvikmynda í Bíó Paradís

Peter Broderick mun halda „master class“ fyrirlestur um dreifingu kvikmynda í Bíó Paradís þann 12. júní næstkomandi. Þetta segir í fréttatilkynningu frá Félagi kvikmyndagerðamanna.

Fyrirlesturinn ber heitið „Building a Personal Audience: What You Need to Know“ og mun Broderick í honum m.a. fjalla um hvernig kvikmyndagerðarmenn ná árangri við að byggja upp persónulegan áhorfendahóp og fer Broderick yfir aðferðir til þess.

following_592x299       Peter Broderick hefur m.a. framleitt kvikmyndir á borð við Following, í leikstjórn Christopher Nolan.

Með því að notast við dæmi frá Englandi, Ástralíu, Kanada og Bandaríkjunum mun Broderick sýna hvernig bein samskipti við áhorfendur eru að styrkja sjálfstæða kvikmyndagerðarmenn í fagi sínu. Með því að sanka að sér fylgjendum kvikmynd eftir kvikmynd geta kvikmyndagerðarmenn aukið sjálfstæði sitt og um leið byggt upp sjálfbæran starfsferil í faginu.

Broderick er forseti Paradigm Consulting, fyrirtækis sem hjálpar kvikmyndagerðarmönnum og fyrirtækjum að þróa leiðir til að ná sem víðtækastri dreifingu, sem mestum fjölda áhorfenda og þ.a.l. að hámarka tekjur. Hann hefur haldið gífurlegan fjölda fyrirlestra víðsvegar um heiminn á síðustu árum, þar á meðal á alþjóðlegu kvikmyndahátíðinni í Toronto (TIFF), Sundance kvikmyndahátíðinni, alþjóðlegu heimildamyndahátíðinni í Amsterdam (IDFA) og Nordisk Panorama.

Broderick hefur einnig gert það gott sem framleiðandi og vann sem slíkur við fyrstu kvikmynd Christopher Nolan, Following, frá árinu 1998. Broderick framleiddi einnig kvikmyndina Manic, sem skartaði þeim Zooey Deschanel og Joseph Gordon-Levitt í aðalhlutverkum

Fyrirlesturinn hefst þann 12. júní í Bíó Paradís, klukkan 16:30, í sal 2. Aðgangur er ókeypis.