Ég er 26 ára milljónamæringur

Barnastjarnan og fyrrverandi kvikmyndaleikkonan Amanda Bynes hefur komið sér í vandræði oftar en einu sinni á þessu ári, en við sögðum frá því hér á síðunni um daginn að Amanda hefði verið ákærð fyrir að hafa í tvígang keyrt á og stungið síðan af frá slysstað.

Menn hafa í kjölfar þessara atvika og annarra, eins og þar sem hún var sögð hafa sprangað nakin um sólbaðsstofu, haft áhyggjur af Bynes. Bynes hefur nú brugðist við þessum áhyggjum og sendi US Weekly tímaritinu eftirfarandi yfirlýsingu: „Það er allt í lagi með mig. Ég geng ekki nakin um á almannafæri. Ég er 26 ára milljónamæringur, sem er hætt að vinna. Vinsamlegast virðið einkalíf mitt,“ sagði Bynes í yfirlýsingunni.

Amanda sló í gegn þegar hún var 10 ára gömul í sjónvarpsþáttunum All that á sjónvarpsstöðinni Nickelodean. Síðan þá hefur hún leikið í myndum eins og She´s The Man, Hairspray og Easy A. Hún hætti störfum sem leikkona árið 2011 og hyggst hasla sér völl sem fatahönnuður.

Stikk: