Feðgar saman á ný í kvikmynd

Feðgarnir Will Smith, 42 ára, og Jaden Smith 12 ára, ætla að leiða saman hesta sína á ný í kvikmynd innan skamms, en þeir léku síðast saman í myndinni The Pursuit of Happyness frá árinu 2006. Myndin hefur ekki enn fengið nafn, en er vísindaskáldsaga framleidd af Columbia Pictures sem er í eigu Sony fyrirtækisins.
Það er sjálfur M. Night Shyamalan sem leikstýrir og skrifar handritið í félagi við annan mann. Shyamalan er frægur fyrir myndir eins og The Sixth Sense og The Last Airbender.

Sony fyrirtækið sagði í tilkynningu að myndin segi frá strák sem er að reyna að bjarga sér og föður sínum eftir að skip þeirra brotlendir á yfirgefinni Jörð í framtíðinni, þúsund árum héðan í frá.

Líkt og þau gerðu myndinni The Karate Kid árið 2010 þar sem Jaden sló í gegn í hlutverki karatestráksins, þá munu foreldrar Jadens, Will og Jada Pinkett Smith verða framleiðendur.