Bandaríski leikarinn Morgan Freeman átti erfitt með að halda sér vakandi í miðju viðtali í beinni útsendingu í morgunþætti á Q13 Fox News í Seattle í Bandaríkjunum, en þar var leikarinn ásamt samleikara sínum í Now You See Me, Michael Caine.
Eins og sést í myndbandinu hér fyrir neðan þá dottar Freeman þegar Caine, sem er áttræður, er að tala um tæknibrellurnar í myndinni.
Til að byrja með kinkar Freeman kolli til að sýna áhuga sinn á því sem verið er að tala um, en að lokum sigrar svefninn hann.
Caine heldur áfram að tala á meðan Freeeman sefur, en leikarinn vaknar svo fljótlega, búinn með kríuna, og nær sjálfur að svara spurningum í lokin.
Now You See me fjallar um persónur sem þeir Jesse Eisenberg, Woody Harrelson, Isla Fisher og Dave Franco leika, sem nota hæfileika sína sem töframenn til að ræna banka.
